Rəqs
Red Bull Dance Your Style Dünya Finalı: Zico Firestar dünya səhnəsində
12 milli titul, təxminən 20 illik təcrübə və Red Bull Dance Your Style Azərbaycan çempionluğu. İndi Zico Firestar ölkəmizi dünya səhnəsində təmsil edəcək.
Rəqs aləmində Zico Firestar kimi tanınan Xəyal Əmrullazadə Red Bull Dance Your Style yarışının Azərbaycanda keçirilən hər üç buraxılışında meydana çıxıb. 2025-ci ildə isə nəhayət qalib gəlib. İndi onu Sürix gözləyir.
Oktyabrın 24-də Sürixin məşhur «Hallenstadion» arenasında Red Bull Dance Your Style Dünya Finalı keçiriləcək. Bu il yarışın tarixində ilk dəfə olaraq evdə, ekran qarşısında oturan tamaşaçılar da qalibin müəyyənləşməsinə təsir göstərə biləcəklər. Yəni Ziconun taleyində sənin də payın ola bilər.
Zico Firestar Red Bull Dance Your Style Azərbaycan Milli Finalında
© Murad Orujov / Red Bull Content Pool
Sürixdəki Dünya Finalı necə keçiriləcək?
Red Bull Dance Your Style təkbətək (1v1) freestyle rəqs yarışmasıdır. Rəqqaslar hansı musiqinin səslənəcəyini əvvəlcədən bilmir, münsif isə yoxdur – qalibi tamaşaçılar seçir.
Zico yarışa 21–22 oktyabrda keçiriləcək Pre-Finals (seçmə finallar) mərhələsində başlayacaq. Burada müxtəlif ölkələrin milli çempionları yarışır və hər mərhələnin ilk dördlüyü finala yüksəlir. 24 oktyabrda onlara xüsusi dəvət almış 8 rəqqas qoşulacaq və ən güclü 16-lıq «Hallenstadion» arenasında çempionluq uğrunda mübarizə aparacaq.
Bu il sənin səsin də nəticəyə təsir edəcək
Tarixdə ilk dəfə canlı yayımı izləyənlər də səs verə biləcək. Nəticənin 80%-ni məkandakı tamaşaçılar, 20%-ni isə rəsmi Red Bull Dance YouTube kanalındakı onlayn səsvermə müəyyənləşdirəcək. Gərgin «battle»larda məhz bu 20% həlledici ola bilər.
Final 24 oktyabrda Bakı vaxtı ilə saat 22:00-da başlayır. Canlı yayıma qoşul, səsvermədə iştirak et və sevimli rəqqaslarına dəstəyini göstər! Dostlarını da bu ritmə qatmağı unutma.
Yeniliklərdən və nəticələrdən xəbərdar olmaq üçün @redbullaz və @redbulldance səhifələrini izlə!
Zico iki onillikdir rəqs meydanındadır
Zico təxminən 20 ildir hip-hop və freestyle rəqs edir. Hip-hop və «all styles» kateqoriyalarında 12 dəfə ölkə çempionu olub, Azərbaycanı xarici yarışlarda dəfələrlə təmsil edib. Meydandan kənarda isə 13 ildən artıqdır ki, məşqçi kimi çalışır və gənc rəqqaslar yetişdirir.
Zico Red Bull Dance Your Style yarışında üç dəfə iştirak edib
İl
Tədbir
Nəticə
2019
Red Bull Dance Your Style Azərbaycan
Ən yaxşı 4-lük
2023
Red Bull Dance Your Style Azərbaycan
16 finalçıdan biri
2025
Red Bull Dance Your Style Azərbaycan
Qalib
25 avqust 2019-cu ildə Heydər Əliyev Mərkəzinin parkında yarış Azərbaycanda ilk dəfə təşkil olundu. 16 rəqqasın qatıldığı «battle»larda Ziko iki mərhələni uğurla keçərək ən yaxşı dördlüyə daxil oldu. Həmin il finalda qələbəni Rayman qazandı.
Dörd il sonra Zico yenidən ölkənin ən yaxşı 16 rəqqası sırasında idi. 3 iyunda baş tutan yarışda qalib Malik oldu, Zico isə ölkənin ən güclü rəqqasları sırasında yerini bir daha təsdiqlədi.
9 avqust 2025-ci ildə yenə Heydər Əliyev Mərkəzinin qarşısında keçirilən Milli Finalda Zico nəhayət çoxdan arzuladığı qələbəni qazandı. Heç bir ssenari, əvvəlcədən hazırlanmış hərəkət olmadan – yalnız improvizasiya və tamaşaçıların səsi. Məhz bu qələbə ona Azərbaycanın milli çempionu kimi dünya səhnəsinə çıxmaq hüququ qazandırdı.
Zico qalibiyyəti qeyd edir
© Murad Orujov / Red Bull Content Pool
Üç buraxılış, üç fərqli nəticə və hər dəfə yuxarıya doğru addım. Bu, səbrin və ardıcıl əməyin necə bəhrə verdiyinin bariz nümunəsidir.
Bakının açıq səmalı meydanından Sürixin nəhəng arenasına qədər uzanan yol Zico üçün illər çəkdi. İndi onun bu yolun ən parlaq səhnəsində necə çıxış edəcəyini görmək növbəsidir.