Yayın Ən Gözlənilməz Festivalları
Yay, azadlıq, dəniz və ritm bir arada böyük festival mövsümü başladı. Elektronik, hip-hop və pop səhnələri bu yay həm ölkədə, həm Avropada unudulmaz anlar vəd edir.
Dream Fest 2026
DREAM FEST 2026
© agalarovdevelopment.com
Xəzər sahilində pop və hip-hop dünyasının ən böyük yay layihəsi şübhəsiz ki, Dream Fest 2026 olacaq. 23-26 İyul tarixlərində Sea Breeze Resort-da baş tutacaq bu nəhəng 4 günlük festivalda Avropa, Amerika və regionun 50-dən çox hit-meykeri eyni səhnəni bölüşəcək. Festivalın buillik layn-apında pop-ikonalarla yanaşı Busta Rhymes və Ty Dolla $ign kimi hip-hop əfsanələrinin adları drayvın səviyyəsini indidən bəlli edir.
Tbilisi Open Air 2026 (Gürcüstan)
Music festival
© Win-Initiative
Sərhədləri bir az aşmaq və regionun nəhəng azadlıq zonalarına keçmək istəyirsənsə, ilk dayanacağın mütləq Tbilisi Open Air 2026 olmalıdır. 4-5 İyul tarixlərində Lisi Wonderland-də keçiriləcək Gürcüstanın bu ən böyük festivalında elektron musiqi səhnəsi olan əfsanəvi "Zion Garden" öz 10 illiyini qeyd edir və bura ilk dəfə enerjili elektronik ritmləri ilə tanınan "Mzesumzira Stage" qoşulur. Slowdive kimi qruplarla yanaşı güclü elektronik və alternativ hip-hop axını axtaranlar üçün bura ideal seçimdir.
Open'er Festival 2026 (Polşa)
Open'er Festival 2026 (Polşa)
© fabfestivals.com
Avropa miqyasında əsl qlobal hitlərin səsini canlı eşitmək istəyənlərin yay marşrutu isə mütləq Polşaya, 1-4 İyul tarixlərində Qdınya hava limanının geniş ərazisində baş tutacaq Open'er Festival 2026-ya yönəlməlidir. Bu il festivalın layn-apı tam mənası ilə bir pop, hip-hop və elektro partlayışıdır; elektronik musiqinin nəhəngi Calvin Harris, dünyanı sarsıdan pop-rezidentlər Jennie (Blackpink), Zara Larsson, Halsey və hip-hop dünyasının xüsusi adı Clipse eyni platformadadır.
Tomorrowland 2026 (Belçika)
Tomorrowland 2026 (Belçika)
© tomorrowland.com
Dünyanın ən böyük və vizual olaraq ən heyranedici elektronik rəqs musiqisi (EDM) festivalı iki ardıcıl həftəsonu — 17-19 İyul və 24-26 İyul tarixlərində Belçikanın Boom şəhərciyində baş tutacaq. Nağılvari səhnə tərtibatı, dünyanın ən nəhəng DJ-lərinin eksklüziv şouları və səs sistemləri ilə bura elektronik musiqi həvəskarları üçün yer üzündəki əsl mərkəzdir.
Ultra Europe 2026 (Xorvatiya)
Festival time!
© STEVE EICHNER
Avropanın ən böyük yay çimərlik və stadion rave-lərindən biri olan Ultra Europe, 10-12 İyul tarixlərində Xorvatiyanın Split şəhərində, Adriatik dənizinin sahilində baş tutacaq. Dünyanın top-səviyyəli elektronik musiqi prodüserlərini, nəhəng LED şoularını və sahildəki yaxt partilərini bir araya gətirən festival, yay tətilini dəniz və yüksək enerjili elektronik ritmlərlə keçirmək istəyənlər üçün mükəmməl nöqtədir.
Sziget Festival 2026 (Macarıstan)
Festival
© Jeremy Deputat/Red Bull Content Pool
Yayın qlobal bağlayıcı nöqtəsi isə 11-15 Avqust tarixlərində Macarıstanın paytaxtı Budapeştdə, Dunay çayının ortasındakı adada qurulacaq Sziget Festival 2026-dır. Dünyanın hər yerindən gələn gənclərin yaratdığı "Azadlıq Adası" konsepti qlobal pop, hip-hop və EDM ulduzlarını, nəhəng arenaları və 24 saat dayanmayan drayvı özündə cəmləşdirir.
İstər qumsal sahillərdə bas ritmləri altında dəniz mehini hiss et, istərsə də Avropanın nəhəng arenalarında izdihamla eyni ritmdə hərəkət et. Bu yay hər anın musiqi, hərəkət və yüksək enerji ilə dolu keçəcək. Tempdən düşməmək və yayın drayvını sonuna qədər yaşamaq üçün hazırlaşın və yayın ritmini sərbəst buraxın!