Bir çoxları üçün yanvar ayının 1-i yeni vərdişlər, yeni həyat və yeni başlanğıclar deməkdir. Yeni ilin ilk günləri həyatımızda dəyişikliklər etmək üçün ən doğru məqamdır və bunun elmi izahı da var!
Köhnə ili geridə qoy, özünə yeni üfüqlər aç, nələrə qadir olduğunu sən də gör!
Niyə yeni həyata başlamaq üçün ayın 1-ni seçirik?
Yeni həyata ayın 1-dən başlamaq bir çoxlarının artıq lağa qoyduğu bir klişe kimi görünə bilər. Psixoloqlar isə yaxşı və davamlı vərdişlər qazanmaq üçün Təzə Başlanğıc effektini tövsiyə edirlər.
Təzə Başlanğıc - insanlara yeni ilin başlanğıcı (əsasən), ad günü və ya digər mühüm simvolik tarixlər kimi müəyyən günlərdə həyatlarını dəyişmək üçün daha çox motivasiya və istək verən psixoloji təsirdir.
Çoxsaylı araşdırmalar göstərib ki, test iştirakçıları təsadüfi bir gündə deyil, məhz hansısa başlanğıc bir tarixdən bir işə başlayırlarsa, onlar daha çox motivasiyalı olub həmin işi sona çatdıra bilirlər. Buna görə də psixoloqlar yeni vərdişlərə başlamaq üçün yanvarın 1-ni məsləhət görürlər.
Bu nə ilə bağlıdır?
● Vəziyyətin simvolikləşdirilməsi. Mədəni və mental tərbiyəmiz belə qurulub ki, Yeni il kimi simvolik tarixlərdə həyatımızı yeniləmək bizə daha asan və rahat gəlir. Bu, artıq bizim DNT-mizdə yazılıb, bir varlıq olaraq başlanğıc effekti bizə təhlükəsizlik hissi verir.
● Ağ kağız effekti. Yenilik və “təmizlik” hissi səni uğursuzluqlardan qaçmağa və qərarlarınıza sadiq qalmağa sövq edir. Məktəbdə hər dəfə yeni dəftər istifadə etməyə başladıqda nə hiss etdiyini xatırlayırsan?
● Psixoloji azadlıq. Təzə başlanğıc keçmiş uğursuzluqlardan xilas olmaq və xoşagəlməz təcrübələrdən uzaqlaşmaq fürsəti kimi qəbul edilir. Bu, motivasiyanı artırır.
● Yeni sən yaratmaq. Mədəni kontekstdə belə bir fikir vardır ki, köhnə təqvimi atıb onu yenisi ilə əvəzlədikdə özümüzü də yeniləmiş oluruq.
Yeni həyata başlamaq üçün nə etmək lazımdır?
Əlbəttə ki, həyatını yaxşılığa doğru dəyişməyə qərar verən hər bir insana uyğun universal strategiya yoxdur, amma aşağıdakı tövsiyələr ümumi bir fikir əldə etməyə kömək edəcək.
1. Geridə qalan ilin hesabatını aparın
Bunu kağız üzərində etmək daha yaxşı olar. Hər sahədə uğur və uğursuzluqların haqqında yaz: münasibətlər, karyera, ailə, sağlamlıq, dostlar, hobbi. Təhlil et - mövcud vəziyyət səni qane edirmi, yoxsa hələ də üzərində işləmək üçün nəsə var? Düşün, həyatında nəyisə dəyişdirmək üçün kifayət qədər güclü bir istəyin varmı? Əgər sadəcə həyatından şikayətlənməyib, öz üzərində işləməyə başlayacaqsansa, dəyişikliklərə hazırsansa və öz parlaq gələcəyin üçün çox çalışmaq istəyirsənsə, o zaman ikinci mərhələyə keç. Əgər belə bir istəyin yoxdursa, deməli dəyişiklik vaxtın hələ gəlməyib. Güvən, motivasiya və iradə hər hansı bir işdə uğurun əsas açarıdır.
2. İstəklərinin siyahısını tərtib et
Gələcəkdə nəyə can atacaqsan? Dəyişikliklər cədvəlini planlaşdır və yaz. Vaxt çərçivələri haqqında danışarkən, imkanlarını real qiymətləndirməyə çalış. Unutma ki, hər şeyi bir anda əldə etmək mümkün deyil. Dəyişikliklər tədricən baş verməlidir (pis vərdişlərdən imtina etmək istisna olmaqla - onlardan tədricən imtina etmək fikri başladığın işi heç vaxt bitirməmək riski daşıyır). Hər bir məqsədə çatmaq üçün nə etməli olduğunu düşün. Nəticələri yaz, onları bölərək tapşırıqlar şəklində formalaşdır.
3. Yeni həyata başladığın zaman özünə inan
Bir çox insanlar həyatlarını dəyişmək üçün qəti qərar versələr də, öz qabiliyyətlərinə şübhə etməyə davam edirlər, yəni uğur qazanacaqlarına inanmırlar. Hər şey yalnız səndən asılıdır! Başqa insanlardan razılıq gözləmək lazım deyil, səni dəstəkləyən çox az sayda insan tapılacaq.
4. Keçmişi elə keçmişdə saxla
Peşman olduğun hər şeyi orada burax - yerinə yetirilməmiş vədlər, əldən verilmiş fürsətlər və həyata keçirilməmiş planların yeni həyatda yeri yoxdur. Sənə əhəmiyyət verməyən insanlarla vidalaş, onların yerinə səni qiymətləndirən və dəstəkləyənlərlə daha çox vaxt keçir. Müasir texnologiyalar dövründə istəyən hər kəs eyni maraqlara və dünyagörüşünə malik dostlar, tapa bilər.
5. Bəhanə yox, fürsət axtar
Çox vaxt məsuliyyətlərdən qorxduğumuz üçün özümüzü uçuruma itələyirik. Hər gün həyatımızın bütün sahələrini dəyişə biləcək nə qədər fürsəti əldən veririk: iş təklifləri, səfərlər, master-klasslar, konsertlər, ev heyvanı sahiblənmək və s. “Yox” deyirik, yaxşı şeylərin həyatımıza daxil olmasına belə şans vermirik və bunun üçün bəhanələr axtarırıq. "Yes Man" filmini xatırlayırsan? Həyatına “HƏ” deməyə çalışmısan?
6. Özünü mükafatlandırmağı unutma
Özün üzərində hər bir qələbə, qələbədir! Bunu unutma, özünü təriflə və mükafatlandır. Dəyişiklik arzusunu təşviq et, özünü motivasiya et, son nəticəni və nəhayətində məqsədinə çatdığın zaman yaşayacağın emosiyaları tez-tez təsəvvür et. Bir dəftər al və bütün nailiyyətlərini oraya yaz.
Nəticə olaraq isə, heç bir zaman olduğun yerdə qalma və həmişə məqsədinə doğru irəlilə. Qarşıdan gələn ildə özünün ən yaxşı versiyasını hazırlamaq üçün əlindən gələni et. Unutma - sən hər şeyi edə bilərsən və hər bir arzun gerçəkləşə bilər!