عمر مدرك - على هوانا
© Farida Boustani
كايت سيرفينج

عمر مدرك - رحلة البحث عن الهواء في "على هوانا" - فيلم كايت سيرفينج

حكاية عمر مدرك صاحب أول رحلة كايت سيرفينج من النيل للبحر الأحمر فري ستايل ومغامرات مائية ورهانات مجنونة!
بقلم ريد بُل مصر
نُشر في ‎

مين عُمر مدرك؟

شاب مصري اتولد وعاش معظم حياته في الجونة، وبسبب طبيعة المكان والبيئة المحيطة؛ كبر على حب البحر والرياضات المائية، ولقى نفسه في ركوب الأمواج بالطائرة الشراعية أو الـ Kite Surfing، بدأ اهتمامه بيها من سن صغير، الأول بالفرجة ومتابعة لاعبيها زي أي محب لأي رياضة، لحد ما قرر ياخد خطوة جدية ويبدأ بكورس للمبتدئين، ويتطور شوية بشوية.

أماكن مبتكرة.. للكايت سيرفينج في مصر

بعد ما صاحب الـ 17 سنة مارس لعبته المفضلة لمدة 8 سنين بين الجونة ورأس سدر، وقدر يعمل حاجة ماحدش سبقه ليها، وهي إنه يـ Surf من نهر النيل للبحر الأحمر في رأس البر بمحافظة دمياط، كان حابب يخوض تحديات أصعب في أماكن جديدة، وبدأت الفكرة بإنه نشر فيديو على صفحته الشخصية بيسأل الناس عن أحسن أماكن ممكن تمارس فيها الكايت سيرفينج في مصر، ويا سلام لو يكون ماحدش جرب فيها الـ Surfing قبل كدة، ومن هنا بدأت رحلته في اكتشاف أماكن أو زي ما بيتقال Spots جديدة.
اركب الصعب..حرفيًا!
من سمات رياضيِّ ريد بُل هي إن مفيش حاجة بتوقفهم ولا تمنعهم عن تحقيق أهدافهم. أول مرة عُمر يعمل فيها Surfing في مكان برة الجونة كان في الجزيرة المجهولة بالغردقة، الجزيرة اللي معروف إنها بتظهر وتختفي مع ظاهرة المد والجزر، ومالهاش وقت محدد في السنة تقدر تبني عليه أي خطط، محتاج تفضل مراقبها علشان تعرف وقت ظهورها. تجربة عمر هناك كانت مختلفة وملهمة، وساعدته يكسر حاجز الخوف ويعمل الحاجة اللي بيحبها في أماكن جديدة، بجانب المكسب الأكبر وهو تعريف ناس أكتر بالرياضة اللي بيمارسها عدد محدود جدًا من الناس.

الرهان!

الرهان بيزيد من قيمة التحدي، ورهانات عمر وأصحابه ما بتخلصش، وكتير منها عايز قلب ميت؛ زي القفز بالكايت من ارتفاع 65 متر فوق سطح البحر، وإنك تفضل متعلق في الهواء لمدة دقايق قبل ما تبدأ الاصطدام بالمياه من الارتفاع ده. وكل ما تزيد صعوبة التحدي بيزيد معاه الإدرينالين، وبعدها يتكتب إنجاز جديد بإسم أبطال الرياضة الوليدة في مصر.

مغامرة كايت سيرف في الفيوم

من الأماكن اللي عمر حب يجرب فيها لعبته كانت الـ Magic Lake في الفيوم، يمكن المنطقة كانت مش أحسن حاجة بسبب قلة قوة الرياح في معظم الأوقات، لكن اللي اكتشفوه إن الرياح لما بتقوم هتديك أحسن تجربة سيرفينج ممكن تعيشها في حياتك، وده اللي حصل مع عمر.
بعد يوم طويل من غير رياح طول فترة الصبح في الفيوم، قامت الرياح بالليل والأجواء كانت مناسبة لركوب الأمواج، وعمر ما كدبش خبر واستغل الفرصة وبعد دقائق كان جوا المياه، علشان يبقى أول لاعب ينزل البحيرة المسحورة بالكايت بالليل، مع إن الرؤية كانت شبه معدومة ومفيش أي نور، بس الحجج ما بتصنعش أبطال، ومُدرك كان "مدرك" ده كويس.

كايت سيرف من الجبل للبحر!

عمر راهن نفسه إنه هيتزحلق بالبورد من على قمة جبل رمال في الفيوم، وهو ماسك الكايت في إيده، وينزل يكمل بيه في المياه عادي.
محاولات غير موفقة! مرة واتنين وثلاثة، فشل فيهم إنه ينط من فوق العربية للبحيرة على طول، لكنه ماستسلمش بسهولة وفضل يغير من التكنيك ويعدل من وضعية جسمه، وأخيرًا؛ عمر بيعملها! ويتزحلق من فوق جبل الرمال ويكمل لجوا البحيرة بمنتهى السلاسة، علشان تكون تجربة فريدة تحسب لبطل السيرفينج الأول في مصر.
مستقبل كبير بينتظر اللاعب صاحب الأداء الشيك والستايل المتفرد، ومنافسات عالمية كتير الفترة الجاية هتشهد على موهبته، وهتخلي اسم مصر بيتردد بقوة في محافل الرياضات المائية العالمية، ليه لأ! وإحنا عندنا بدل البحر اتنين ونيل وبحيرات وغيرها من المسطحات المائية المثالية، قريب متوقعين المزيد من عمر مدرك ورفاقه.

الحلقة الاولي - كايت سيرفينج في الجزيرة المجهولة

كايت سيرفينج · ‎13‎ دقيقة
على هوانا - الحلقة الاولى: كايت سيرفينج على الجزيرة المجهولة

الحلقة التانية: بحيرة الليل

كايت سيرفينج · ‎11‎ دقيقة
على هوانا - الحلقة الثانية: كايت سيرفينج في البحيرة المسحورة

الحلقة الثالثة: كايت سيرفينج في سيوة

كايت سيرفينج · ‎12‎ دقيقة
على هوانا - الحلقة الثالثة: الرمل والملح

الحلقة الرابعة: كايت سيرفينج في النيل

كايت سيرفينج · ‎14‎ دقيقة
على هوانا - الحلقة الرابعة: كايت سيرفينج في النيل؟
تابعونا على انستجرام واستونا الحلقات اللي جاية
تابعوا عمر مدرك ونوبز اون بوردز على انستجرام