الألعاب
محمد "لايت" طارق: من الثانوية للعالمية
مشوار محمد طارق مع الجيمينج من سن ٧ سنين، لحد ما احترف لعبة Clash Royale واللي خلت اسمه معروف في العالم كواحد من أحسن لاعبيها.
بدأ مشوار محمد مع الجيمينج من سن ٧ سنين، لما اكتشف لعبة Subway Surfers على الموبايل. ومن حبه في الجيمينج، لعبة واحدة مكانتش كفاية، فبدأ يستكشف لعب تانية على الموبايل لحد ما في يوم نزل لعبة Clash Royale من غير ما يعرف إن دي اللعبة اللي هتخلي اسمه معروف في العالم كواحد من أحسن لاعبيها.
لعب محمد Clash Royale وعجبته، ولقى عنده موهبة فيها، فبدأ يطور من نفسه ويلعبها أكتر وأكتر. وده كان من ثلاث سنين تقريباً، يعني محمد كان لسه في إعدادي، وكعادة أي أسرة مصرية، الموضوع ده كان غريب عليها جداً وكان مرفوض تماماً إن اللعب ياخد كل الوقت ده من حياة محمد، وده طبعاً سبب مشاكل كتير بينه وبين عيلته.
ولكن ده موقفش محمد، وحبه للعبة فضل يزيد، وفضل يطور من نفسه لحد ما جاله عقد للإنضمام لفريق Kix Team، وهنا عيلته بدأت تشوف إنه يمكن كان عنده حق، وإن الجيمينج والesports ممكن يوصلوا لحاجة فعلاً، فبدأ موقفهم يتحول لموقف داعم أكتر من أي وقت قبل كده، وبدأ محمد يعرف إزاي يوازن بين لعبه ومذاكرته، ففي الأيام العادية مثلاً ممكن يلعب أكتر، ولكن في وقت الامتحانات، أكيد بيذاكر أكتر.
Mohamed _Light_ Tarek
© Mohamed Tarek
على الرغم من التوتر وشدة الأعصاب اللي بتقلق محمد قبل أي بطولة، إلا إنه قدر يشارك في بطولات ومباريات مختلفة، وكسب في كتير منها، وآخرها كانت مشاركته في أول نسخة من بطولة Clash Royale League 2021 واللي هي البطولة الرسمية للعبة واللي بتنظمها الشركة المطورة ليها. وشارك محمد في البطولة دي وأخد المركز الأول في الFebruary Monthly Finals اللي كسب فيها ٢٠ ألف دولار. ودي كانت أول نسخة لبطولة العالم في Clash Royale واللي لسه هيكون ليها ٧ كمان لحد ما توصل لنهائيات العالم؛ ومحمد ناوي يشارك في كل واحدة فيهم.
كبر محمد في المنصورة، وكبر على حب القراءة اللي لحد دلوقتي بيمارسها في وقت فراغه لما يكون مش بيلعب ولا بيذاكر، وبيحب أكتر قراءة الروايات، سواء باللغة العربية أو الإنجليزية.
وعلى الرغم من المكانة اللي وصلها في مجتمع Clash Royale، إلا إنه عارف إنه لازم يفضل بطور من نفسه علشان يفضل في المكانة دي، وعلشان كده، محمد حريص جداً على إنه يلعب التحديات اللي بتنزل في اللعبة كل يوم، ده غير إنه ساعات بيتدرب مع لاعبين تانيين، تحديداً قبل البطولات.
حب محمد للعبة هو اللي مخليه مكمل فيها لحد دلوقتي، ده غير رغبته في إنه يحقق حاجة لنفسه وينجح فيها، ونفسه يكون في يوم من الأيام أحسن لاعب Clash Royale في العالم، والأكيد إنه لو فضل مكمل بنفس الطريقة دي، الحلم ده هيكون سهل تحقيقه.
تأثير Clash Royale على محمد امتد لبره اللعبة كمان، فهو بيأكد إنها من أهم الحاجات اللي علمته الهدوء والصبر، ده غير دورها في تنشيط المخ وتدريبه على التفكير الاستراتيجي وحل المشكلات، وده لأنه لازم وهو بيلعب، يفكر كويس جداً في أي حركة هيعملها الخصم علشان يعرف هو هيلعب إزاي بعدها.
في الآخر، نصيحة محمد لأي حد عايز يحترف Clash Royale أو أي لعبة، هي الصبر، وهو ده اللي هيوصله إنه يحقق اللي هو عايزه، وإن ده مش في اللعب بس، ده في الحياة عموماً.