الألعاب
اشحن طاقتك مع تمارين رياضية في المنزل تناسب مشاغلك اليومية!
معندكش وقت تروح الجيم؟ التمارين الرياضية في المنزل بقت تريند دلوقتي
معندكش وقت تروح الجيم؟ التمارين الرياضية في المنزل بقت تريند دلوقتي، وده لأنها بتساعد توصل لهدفك وتحافظ على صحتك البدنية والنفسية، من غير معدات ولا اشتراك جيم غالي. تعالى نقولك إزاى.
فوايد ممارسة الرياضة
- تحسين الدورة الدموية وصحة القلب: بتساعد التمارين على تقوية عضلة القلب وتدفق الدم لكل الجسم، وده بيقلل من خطر أمراض القلب والسكتة الدماغية.
- تقوية العضلات والعظام: بتُساعد كمان على بنا كتلة العضلات وزيادة كثافة العظام، وده بيقلل من خطر الهشاشة.
- تحسين الحالة النفسية وتقليل التوتر: وانت بتتمرن بيتفرز هرمونات السعادة، زي الإندورفين، وده بيحسن المزاج وبيقلل من التوتر والقلق.
- زيادة مستوى الطاقة والنشاط: بتزود التمارين قدرة التحمل ومستوى الطاقة للأنشطة اليومية.
أنواع التمارين الرياضية في المنزل
تمارين الإحماء
مهم تبدأ بتمارين الإحماء قبل أي نشاط رياضي عشان تسخن العضلات وتحسن مرونتها، زي:
- القفز الخفيف: لمدة دقيقتين.
- المشي في المكان: لمدة 3 دقائق.
- تحريك مفاصل: حرك مفاصل الركبتين والكاحلين والمرفقين والكتفين في اتجاهات مختلفة.
تمارين القوة والمقاومة
تمارين القوة والمقاومة بتقوي العضلات وبتحسن القدرة البدنية، زي:
- تمارين الضغط: جرب تمارين الضغط على الأرض أو الحيطة.
- تمارين البلانك: اسند على مرفقيك وأصابع قدميك، وحافظ على استقامة جسمك .
- تمارين السكوات: أبعد رجليك عن بعض على قد عرض الكتفين، وانحنى كأنك هتقعد على كرسي.
تمارين الكارديو
تمارين الكارديو بتزود حرق السعرات الحرارية وبتدعم صحة القلب، زي:
- نط الحبل: لمدة 10 دقائق.
- الجري في المكان: لمدة 15 دقيقة.
- تمرين العجلة: نام على ضهرك وحرك رجليك كأنك بتسوق عجلة.
تمارين المرونة
- اليوجا: تمارين اليوجا البسيطة بتركز على تحسين المرونة والتوازن.
- تمارين التمدد: دايمَا أعمل تمدد لعضلاتك الرئيسية بعد كل تمرين.
جداول تمارين رياضية في المنزل
- جدول تمارين للمبتدئين: أعتمد على تمارين الإحماء، وتمارين القوة الخفيفة، وتمارين الكارديو، وتمارين المرونة، وممكن تتمرن 3 مرات في الأسبوع.
- جدول تمارين للسيدات: بتركز على تحسين اللياقة العامة للجسم وتقوية العضلات الأساسية، وبتبقى 3-4 مرات في الأسبوع.
- جدول تمارين للرجال: تمارين أقوى لبنا العضلات وزيادة القوة الجسمانية، وبتبقى 4-5 مرات في الأسبوع.
إزاي توصل لأحسن نتيجة من التمارين الرياضية في المنزل ؟
- الالتزام بجدول: عشان تطلع بأفضل نتايج، لازم تلتزم بالتمرين سواء 3 أو 4 أو 5 مرات في الأسبوع حسب اختيارك.
- أكل صحي ومتوازن: مهم جدًا إنك تمشي على نظام صحي غني بالبروتين والفواكه والخضروات والحبوب الكاملة.
- شرب الميه: شرب كمية كافية من الميه ضروري عشان تحافظ على صحة الجسم وقت التمارين وبعدها.
- النوم والراحة: جسمك محتاج يرتاح عشان يقدر يأدي كويس، فحاول تنام 7-8 ساعات في اليوم.
- الأدوات البسيطة اللي في البيت: ممكن تستخدم زجاجات الميه كأوزان وممكن تمليها بالرمل وتبقى أوزان خفيفة. واستخدام الكرسي لتمارين البلانك والضغط.
المقال ده للمعلومات بس. الرياضة بتتغير بسرعة، فالأحسن إنك تتأكد من متخصصين قبل ما تاخد أي قرار.