الطائرات الورقية
طيارين Red Bull Paper Wings بيستخدموا تصاميم بسيطة عشان يعملوا طيارات ورق تكسب بطولة العالم. هنعرفك دلوقتي على طريقة تعمل بيها طيارة ورق في دقايق قليلة - كل اللي محتاجه هو ورقة واحدة بس.
لما نتكلم عن طيارات الورق، فيه حاجات كتير نتعلمها من الطيارين في فئات Airtime و Distance في Red Bull Paper Wings، لأنهم بيعملوا حاجات مدهشة بورقة A4 بس من غير أى تقطيع أو تلزيق. هى شوية طيات دقيقة بتطلع نتايج زي الـ 13.33 ثانية وقت الطيران الفايز كاميرون كلارك (أستراليا)، و56.61 متر مسافة طيران الفايز جاك هاردي (أمريكا) في 2019.
في الأغلب، الطيارين بيبدأوا بتصميم بسيط وبعدين يعملو تعديلاتهم عشان يضيفو ميزة لطيارتهم.
فهنقولك ازاي تعمل تصميم بسيط يبقى قوي وسهل التوازن، وبيطير كويس. وكمان يعتبر أساس لو عايز تبتكر وتضيف تحسينات.
هات ورقة وأمشي على الخطوات اللي تحت بالتفصيل:
- اطوي الورقة من النص بالطول عشان يكون فيها خط في النص. عشان تكون الطيارة متوازنة، خد وقتك إن الأطراف تبقى قدام بعض بالظبط. بعدين افردها كأنك بتفتح كتاب.
- خد الزاوية اليمين فوق واسحبها عشان تقابل الخط اللي في النص. اعمل نفس الحاجة مع الزاوية الشمال. (طيارتك هيكون شكلها زي بيت بسقف مدبب). ركز انك تخلي الطية بالضبط في المكان اللي انت عايزه من أول مرة. التعديلات بتعمل تنيات في سطح الورقة وده ممكن يسبب مقاومة في الطيران.
- دلوقتي اطوي الزوايا الجديدة اللي فوق يمين وشمال للخط اللي في النص، عشان يبقى شكلها قريب من المثلث. اتأكد إن الطيات تكون نضيفة وحادة بأنك تضغط بقوة.
بعد كده، اطوي الطيارة من النص على طول الخط اللي في النص كأنك بتقفل كتاب، وتكون الورقة الناعمة من بره.4.
5. وأخيرًا، الخط الطويل اللي في النص هيبقى قاعدة الطيارة، اطوي الأطراف اللي فوق لتحت عشان تعمل الأجنحة (خط جديد على كل جنب يكون موازي تقريبًا للخط اللي في النص). لازم يكون عندك مساحة كافية بين طية الجناح والطية اللي في النص عشان تمسك طيارتك.
6. بس كده، دلوقتي تقدر تطيرها.
نصايح المحترفين:
- لو مقدمة الطيارة طلعت لفوق فجأة وبعدين وقعت، ده معناه إن الطيارة كأن حصلها عٌطل. جرب تتني الجزء اللي ورا من الأجنحة لتحت، بس بشكل خفيف ومن غير ما تعمل طية.
- لو مقدمة الطيارة نزلت لتحت على طول، جرب تتني الجزء اللي ورا من الأجنحة لفوق.
آخر نصيحة هى أن تني الجزء اللي ورا من الأجنحة هيساعدك تعمل حركات في الهواء!
جاهز للطيران؟ خلينا نشوف اجمد فيديو ليك على على تيك توك ومتنساش تعمل تاج لـ redbull@ وتحط هاشتاج redbullpaperwings#
