الجري الحر
٧ خرافات عن الجري… جه الوقت انها تنتهي
بتحب الجري؟ أو لسه بتفكر تبدأ؟
حلو أوي.. بس خلينا نتفق على كام حاجة في الأول.. في شوية خرافات كدة في دماغ الناس، وممكن تكون معطلاك أو بتمنعك إنك تبدأ من غير ما تحس.
خلينا نكسرهم واحدة ورا التانية… جاهز؟ خلّي الـ pace عالي ويلا بينا نبدأ.
١. الجري وانت مبلول أو في البرد؟ هيخليك تعيا
عارف جملة: "هتاخد برد لو جريت وانت عرقان"؟ أهي دي خرافة قديمة.
اللي بيجيب البرد مش الجو، لكن الفيروسات نفسها. ولو انت بتتمرن بانتظام، جهازك المناعي هيكون أقوى بكتير.
يعني لو الجو برد.. سخّن كويس، وانزل اجري.
٢. تمارين الحديد هتخليك أبطأ
لو فاكر إن تمارين الأوزان هتقلل سرعتك، فـ انت غلطان… عشان اللي هيحصل هو العكس تمامًا.
العضلات الأقوى = ثبات أكتر = إصابات أقل.
كلهم جزء من الـ meta بتاع أي runner جامد.
٣. لازم تجري 30 دقيقة عشان تبدأ تحرق دهون
مانعرفش مين اللي قال كدة
بس الجسم بيحرق دهون من أول دقيقة، بس النسبة بتزيد مع الوقت.
يعني حتى الربع ساعة جري مهمين ماتستهونش بيهم.
الفكرة مش في الوقت.. الفكرة إنك تتحرك… وتفضل مكمّل.
٤. لازم تعمل إطالات كويس قبل الجري
تمارين الإطالات الثابتة قبل الجري مش أحسن حاجة.
ابدأ بتسخين مختلف ويعوّد عضلاتك على الحركة: زي swing للساقين وlunges و skipping.
خلي الطاقة تجري في جسمك.
٥. الجري بيتعب الضهر
لو عندك تكنيك صح وكوتشيهات Running حلوة، ضهرك مش هيشتكي.. بالعكس دة هيشكرك.
الحركة بتنشّط الغضاريف، وتقوي العضلات حوالين العمود الفقري.
يعني الجري مش عدو الضهر… بالعكس، دول بيست فريندز.
٦. لو مفيش عرق… يبقى التمرين مش قد كدة
العرق مش مقياس لمجهودك.
الناس بتتعرق بدرجات مختلفة حسب طبيعة الجسم.
ومع زيادة لياقتك، جسمك بيعرف يتحكم في درجة حرارته بشكل أسرع.
المهم إنك تتحرك وتشرب مياه كويس.
٧. الجري على الأسفلت بيأذي الركب
الأسفلت مش وحش أوي كدة… طالما لابس كوتشي مريح.
الركب بتتأثر بالكوتشيهات اللي جودتها قليلة و الوضعيات الغلط، وعدم الراحة.
بس طالما بتلبس كوتشي مناسب وبتتمرّن صح، الأسفلت مش هيكون مشكلة بالنسبالك.
التغيير بين أرضيات مختلفة بيفيد الجسم، بس مش لازم تبعد عن الأسفلت خالص.
اللي عايزين نقوله..
ان الجري بسيط… بس دماغنا بتحب تعقّد الموضوع.
شيل الخرافات دي من دماغك، وابدأ أول تمرينة وانت واثق في نفسك.
