موسيقى
رحلة زياد ظاظا من الفيوم للقاهرة
في 3 مايو زياد ظاظا كان نجم حفلة صدى صوت في الفيوم. الرابر الموهوب، ابن الفيوم، رجع لبلده وقدم حفلة محصلتش قبل كده.
بقالنا كتير بنسمع زياد ظاظا بس تعرف انه أصلًا من الفيوم؟
في 3 مايو زياد ظاظا كان نجم حفلة صدى صوت في الفيوم. الرابر الموهوب، ابن الفيوم، رجع لبلده وقدم حفلة محصلتش قبل كده. زياد ظاظا، اللي اتولد سنة 2000، بدأ رحلته في المزيكا من الفيوم، المكان اللي الناس بتعرفه كصحرا، بس هو شايف فيه جوانب تانية مليانة حياة ومدينة بتعيش فيها أحلام الشباب.
الفيوم: مدينة وصحرا مع بعض
الفيوم بتعتبر واحة بتجمع بين جمال الطبيعة وآثار الماضي. تخيل نفسك ماشي وسط هياكل الحيتان المتحجرة بوادي الحيتان، متحف طبيعي مفتوح بيحكي عن عصر ما قبل التاريخ. وكمان الفيوم مشهورة بعيون المياه الساخنة العلاجية وبحيرة قارون وهرم ميدوم الغريب اللي بيبهر الزوار.
زياد ظاظا في عالم المزيكا
زياد بدأ مشواره الفني في سن صغير لما كان بيعمل مهرجانات مع صاحبه، بس مكانش لاقي نفسه لحد ما بدأ يسمع راب وقرر يدخل المجال ده. هو زهق من الراب اللي جاي من بره وقرر إنه عايز يسمع ده هنا، لحد ما شاف إن فيه ناس ابتدت تخلق مشهد الراب في مصر.
مزيكته بتتكلم عن موضوعات بتهم الشباب ودايمًا بيحاول يعبر عن همومهم في أغانيه اللي بتتكلم بلغة الجيل الجديد، زي في أغنية "باشا باشا" و"عالوضع". زياد ظاظا عنده حضور قوي على السوشيال ميديا، وده ساعده إنه يبني جمهور كبير بيتابعه وبيشارك معاه تجاربه.
أول أغنية ليه "فريش" نزلت سنة 2020، ومن هنا بدأ ياخد خطوات كبيرة في مسيرته. دلوقتي عنده ألبومين ناجحين وملايين المشاهدات على أغانيه.
غير كده، شارك في بطولة فيلم قصير اسمه "60 جنيه" مستوحى من واحدة من أغانيه، وأخرجه عمرو سلامة.
صدى صوت في الفيوم: حلم اتحقق
Ziad Zaza
© Red Bull
لما جاتله فرصة يشارك في صدى صوت في الفيوم، زياد كان متحمس جدًا. هو بيقول إن ريد بُل حققتله حلمه بأنه يعمل حفلة في الفيوم. لما طلع على الستيج وشاف الشباب متحمس، كان حاسس إنه بيعمل حفلة كل يوم في مدينته. دي كانت لحظة تحقيق حلم، وبيخطط إنه يفضل يعمل حفلات هناك دايمًا.
هوبا وزياد ظاظا
لما جاتله فرصة يختار حد يشاركه في الحفلة، زياد ما ترددش واختار هوبا، الفنان اللي كان بيتأثر بيه من وهو صغير. الشراكة دي كانت لحظة خاصة جدًا لزياد، اللي شاف فيها إنجاز كبير إنه يقدر يعمل حفلة في الفيوم ويجيب حد بيحبه على الستيج معاه.
عرفت اني ممكن اعمل حفله في الفيوم وهعمل كدا دايمًا
وبعدها بأسبوع، زياد ظاظا اتقابل مع ارسينك والفايف وسلايفر وليجيسي وموسى في القاهرة، وعملوا حفلة الختام اللي جمعت كل الرابرز دول على مسرح ريد بُل صدى صوت يوم 10 مابو اللي فات.
خليك متابعنا عشان تعرف كل الأخبار أول بأول.
