موسيقى
حوار مع ملك الغناء الصوفي عبد الرحمن رشدي
من ريد بُل ساوند كلاش لحلم هيحققه بعد ١٠٠ سنة!
عبدالرحمن رشدي 1
© [unknown]
أول ظهور له كان في ريد بُل ساوند كلاش ٢٠١٥ لما كان الـ Wild Card لفريق كايروكي أمام منافسيهم شارموفرز، ومن وقتها انطلق في مشوار النجومية.
عبدالرحمن رشدي عمره ٢٣ سنة، درس التسويق في الجامعة البريطانية بالقاهرة، وبعد التخرج عمل في نفس مجال دراسته بإحدى الشركات في منطقة المعادي اللي اتولد وعاش فيها طول سنين عمره.
قابلنا عبدالرحمن وسألناه ٦ أسئلة بالضبط جاوبنا عليها بصراحة:
١- امتى قررت إنك تغني؟ وهل ده كان حلمك من البداية؟
- أنا قررت أخوض تجربة الغناء سنة ٢٠١٢ وعملت كذا أغنية لواحدي، لكن القرار بالاستمرار في الغناء كان لما كايروكي قرروا إني أظهر معاهم في برنامج ميكروفون، من ساعتها أخدت الموضوع بجد، وأكيد ده كان جزء من حلمي!
٢ - ليه اخترت الغناء الصوفي بالتحديد؟
- اخترت الصوفي لأن أنا طول الوقت نفسي اتكلم عن ربنا لكن بطريقة مختلفة، طريقة تخلي الناس تعيش فيها عن طريق الموسيقى لكن في نفس الوقت مش بطريقة تقليدية.
عبدالرحمن رشدي 2
© [unknown]
٣ - مين مثلك الأعلى؟
- لو قلنا في الموسيقى الصوفية مثلًا ماقدرش أقول حد معين بصراحة، لكن باحب أسمع ناس كتير، بس بتخيل إني ممكن أنا مثل أعلى للناس في النوع ده من الغناء بعد ١٠٠ سنة مثلًا!
٤ - امتى هتعمل حفلة لواحدك؟
- هاعمل ده لما أكون استقريت على أعضاء الباند، والأغاني اللي معايا يكون سهل تقديمها لايف على المسرح.
٥ - فيه مشروع ألبوم غنائي؟
- حاليًا مفيش تجهيزات لألبوم لكن أكيد الفكرة في الخطة، لكن الفترة دي تركيزي كله على الـ Singles لحد ما أقدر أعمل ألبوم.
٦ - إيه ممكن يخليك تعتزل أو تبطل غناء؟
- اعتقد الموت بس هو اللي ممكن يمنعني من الغناء، لكن في نفس الوقت بأحلم أن صوتي وأغنياتي تفضل موجودة في الدنيا لحد نهاية العالم، وبعد ما أنا أموت اتمنى صوتي يفضل عايش إن شاء الله!
